ДСМ зардап шеккен кеншілерге көмек көрсету үшін Қарағандыға дәрігерлер бригадасын жіберді

Денсаулық сақтау министрлігі зардап шеккендерге кеңес беру үшін құрамында токсиколог, ортопед-травматолог және нейрохирург бар дәрігерлер тобын Қарағандыға жіберіп жатыр, деп хабарлайды Orda.kz.

Ведомствоның мәліметінше, зардап шеккен кеншілердің өмірі мен денсаулығын сақтау үшін жоғары білікті мамандарды тарта отырып, барлық қажетті медициналық көмек көрсетілуде.

«Қазіргі уақытта профессор Х.Ж.Мақажанов атындағы көп бейінді ауруханаға 18 адам жеткізілді, оның 17-сі стационарлық емдеуге жатқызылды, бір зардап шегуші амбулаторлық емделуде» делінген хабарламада.

Аурухананың токсикология бөлімінде жеңіл және орташа дәрежеде газбен уланған, жағдайы нашарлаған 15 зардап шегуші ем қабылдауда. Бір адам полижарақаттанумен жансақтау бөлімінде жатыр, жағдайы ауыр, тұрақты, есі дұрыс.

Тағы бір жәбірленуші травматология бөлімінде медициналық көмек алуда, жағдайы орташа ауыр.