Дауға қалған Атырау мұнай өңдеу зауытының экс-басшысы жаңа қызметке тағайындалды

Атырау мұнай өңдеу зауытының бұрынғы бас директоры Мұрат Досмұратов немқұрайлылық жасады деген айыппен сотталып, кейін толық ақталғаннан соң жаңа қызметке кірісті. Ол «ҚМГ Инжинириң» ЖШС-нің мұнай өңдеу және мұнай-химия жөніндегі басқарушы директоры болып тағайындалды, деп хабарлайды Orda.kz.

Мұрат Досмұратовтың жаңа қызметке келгенін мұнай-газ саласының сарапшысы Олег Червинский өзінің Telegram -арнасында жазды. Ол бұрынғы Атырау мұнай өңдеу зауыты (АМӨЗ) басшысының ақталғанын және қайтадан ҚМГ құрылымдарында еңбек етуге мүмкіндік алғанын атап өтті.

«Саладағы әріптестері Досмұратовты мол тәжірибесі бар, жоғары білікті маман ретінде сипаттайды. Ол – химия инженері, Губкин атындағы Мәскеу мұнай-химия және газ өнеркәсібі институтының түлегі, сонда кандидаттық диссертациясын қорғаған. Шымкент мұнай өңдеу зауытында қарапайым қондырғы операторы қызметінен бастап бас технологқа дейін көтерілді. Кейін ҚМГ, KPI Inc., Rominserv SRL, KLPE компанияларында еңбек етті», – деді Червинский. 

Мұрат Досмұратов 2022 жылы Атырау МӨЗ-ін басқарды. Сол кезде зауытта үш ай бойы жылу алмастырғышқа қатысты мәселе шешілмей тұрған еді. Өндіруші компания кепілдік бойынша құрылғыны ауыстырудан бас тартқан. Осыған байланысты Досмұратовқа «қызметін тиісінше атқармады, жаңа жабдық алуға қаржы бөлді, соның кесірінен зауыт екі миллиард теңгеге жуық шығынға ұшырады» деген айып тағылды. Экс-директорды сот айыпты деп танығанымен, 2024 жылдың соңында Бас прокуратура істі қайта қарады.

2025 жылдың тамызында Атырау облыстық соты Досмұратов ісін қайта қарады. Бұл – қазақстандық соттарда сирек кездесетін жағдай болды. Аймақ прокуратурасы айыптаудан өз еркімен бас тартты. Соның нәтижесінде бұрынғы Атырау мұнай өңдеу зауытының басшысы толық ақталып, мемлекет негізсіз қылмыстық қудалау үшін ресми түрде кешірім сұрады.