Дәрігерлердің салғырттығы: Меруерт Ауылбаеваның өліміне қатысты іс ақыры сотқа жетті

Балқаш қаласының тұрғыны Меруерт Ауылбаева соқыр ішек болып, ауруханаға түседі. Алайда жасалған отадан кейін көз жұмды. 2023 жылдың қарашасында болған қайғылы оқиғадан кейін арада бір жарым жыл өткенде ғана қылмыстық іс сотқа жолданды, деп хабарлайды Orda.kz.

Бұл іске байланысты қылмыстық жауапкершілікке тарту мерзімі 2025 жылдың күзінде аяқталады. Осынша уақыт бойы марқұмның ағасы Айтбек Ауылбаев әділ тергеу жүргізілуін талап етіп келді. Тергеу аяқталғаннан кейін ол істің егжей-тегжейін мәлімдеді.

Айтбектің айтуынша, қарындасы 2023 жылдың 27 шілдесінде «жедел перитонит» диагнозымен ауруханаға түскен. Дәрігерлерде іш қуысындағы қабынуды растайтын ультрадыбыстық зерттеу (УДЗ) қорытындысы болған. Алайда ота тек 3 тамызда, яғни, ауруханаға жатқызылғаннан кейін бір апта өткен соң ғана жасалған.

«Оны неге жеті күн ұстады? Неге бірден ота жасалмады? Әдетте соқыр ішек болған науқасқа бірнеше сағаттың ішінде ота жасайды. Меніңше, дәл сол кезден бастап оның жағдайы нашарлай бастаған», — деп жазды Айтбек Ауылбаев әлеуметтік желіде.

Отадан кейін Меруерт ауруханада бір айға жуық жатқан. Туыстарының айтуынша, оны дене қызуы жоғары болғанына қарамай, үйіне жіберген.

«Отаны уақытында жасамағаны аздай, тіпті тілікті де дұрыс жерден жасамаған. Бұл іш қуысын толық тазартып, өңдеуге мүмкіндік бермеген», — дейді марқұмның ағасы.

Меруерттің жағдайы одан әрі нашарлай берген. Емханаға бірнеше рет барғанымен, ем қонбаған. Кейін Қарағандыдағы жеке «Alanda» клиникасына жүгінген. Онда дәрігерлер оған отадан кейінгі сепсис диагнозын қойған. Бірақ әйелді ауруханаға жатқызбаған. Керісінше, Балқашта ота жасаған хирургқа барып қаралуды ұсынған.

Айтбектің айтуынша, кейінгі хирургиялық оталар Меруерттің жағдайын одан сайын ушықтырған. Өлім туралы куәлікте өлім себебі ретінде Крон ауруы көрсетілген.

«Орда» бұл іске қатысты сотты бақылап, ақпарат таратады.

Еске сала кетсек, тілшіміз Айтбек Ауылбаевтан сұхбат алған еді. Ол сұхбатта марқұм әпкесі Меруерт Ауылбаеваның дәрігерлердің салғырттығынан қаза болғанын айтқан еді.