Бойжеткен Талғат Мұсабаевтан таяқ жеп қалдым дейді

Нұр-Сұлтан тұрғыны сенатор және бұрынғы ғарышкер Талғат Мұсабаев соққыға жыққанын айтты. Полиция департаменті ақпаратқа қатысты түсініктеме берді.

Бұл туралы Orda.kz хабарлады.

Оқиға 24 маусымда астаналық саябақтардың бірінде болған. Алина Нұртас итімен серуендеп жүргенде, оған біреу дауыс көтерген.

– Мен қарғыбау таққан итіммен серуендеп жүргенмін, тұмсығы да жабық болған (заң бойынша міндеттелмейді), қолымда пакеттерім бар. Мен келе жатырмын. Артымнан біреу айқайлап жатыр. Ары қарай жүре бердім. Артымнан тағы да айқайлады. Мен ашулы адамға бұрылмастан өзіме «тезірек жүр» дедім. («Алина үндеме! Өзің кінәлісің!» «Жоқ, бұл менің кінәм емес. Бұл менің негізсіз агрессияға деген реакциям»), - деп жазды бойжеткен Instagram парақшасында.

Қыздың айтуынша, белгісіз адам оның қолын жұдырығымен ұрған. Жәбірленуші полиция шақырды, бірақ іс жабылып қала ма деп қорқады.

Нұр-Сұлтан полиция бөлімінің баспасөз қызметі бұл оқиға бойынша тергеу амалдары жүргізіліп жатқанын хабарлады.

– Ағымдағы жылдың 24 маусымында сағат 17:22-де 102 желісіне «Триатлон» саябағындағы Момышұлы көшесінде ер адам қызды ұрып, онымен дөрекі сөйлескені туралы қоңырау түсті. Оқиға орнына көлік патрулі жіберілді. Ер адам мен ит иесі арасындағы жанжал үй жануарларымен қарғыбаусыз серуендеуіне байланысты туындағаны анықталды. Аталған факт бойынша тексеру жүргізілуде, - деп хабарлады департамент.