БҚО-да Тоқаев эвакуцияланған тұрғындармен кездесті

Тоқаев Батыс Қазақстан облысының су басқан аумақтарының үстінен тікұшақпен ұшып өтті.

Бұл туралы Ақорда хабарлайды.

Бұдан кейін мемлекет басшысы Қаратөбе ауданындағы эвакуациялық пунктке барды.

«Мен жергілікті жағдаймен танысу үшін арнайы келдім. Бұл бұрын-соңды болмаған табиғи апат, сондықтан біз бірігіп, ортақ күшпен қарсы тұруымыз керек. Мемлекет, үкімет көмек қолын созады, материалдық және қаржылық көмек көрсетіледі. Уайымдамаңыздар, бәрі жақсы болады»,- деді Токаев.

Президент бұрын-соңды мұндай көлемдегі су тасқыны болмағанына назар аударды.

Оның айтуынша, мұндай жағдай 1994 жылы  болған, бірақ қазіргі су тасқыны кең етек алған.

Эвакуацияланған тұрғындар Тоқаевтан Жақсыбай және Қалдығайты өзендеріне көпір салуды, сондай-ақ елді мекендерге жақын орналасқан бөгеттерді жөндеуді сұрады.
Президент үкіметке тиісті тапсырмалар берді. Ол тасқын суды халық игілігіне пайдалану керектігін қадап айтты.