Біз Ресейдің қалған шарттарды орындағанын күтеміз - Әзірбайжан президенті

Ресей қалған талаптарды орындайды деп күтеміз, деді Әзірбайжан президенті Ильхам Әлиев Әзірбайжан телеарнасына берген сұхбатында.

«Біздің талаптарымыз: Ресей ресми кешірім сұрап, кінәсін мойындап, кінәлілерді жауапқа тартып, Әзірбайжанға, зардап шеккен жолаушылар мен экипаж мүшелеріне өтемақы төлеуі керек. Талаптардың бірі орындалды – Ресей кешірім сұрады. Қалған шарттардың барлығы түгелдей орындалады деп күтеміз», - деді Әлиев AzTV арнасына берген сұхбатында.

Әлиев оқиғаның бастапқы кезінде Ресей тарапынан болған оқиғаны жасыру әрекеттері болғанын тағы бір рет еске салды.  

«Ресейдің ресми құрылымдарының болжамды газ баллонының жарылуына қатысты нұсқалар ұсынғаны бізді қатты таң қалдырды. Бұл ресейлік тараптың бұл мәселені жасыруға тырысқанын анық көрсетті, бұл, әрине, ешкімге абырой әкелмейді. Өкінішке қарай, алғашқы үш күнде біз Ресейден тек күлкілі нұсқалар естідік», - деп бөлісті Әлиев. 

Әзірбайжан тергеуді Мемлекетаралық авиациялық комитетке беруден бас тартты, себебі олардың жұмысының объективтілігі күмәнді деп санайды.

«Бастапқы нұсқалар бойынша жұмыс жүргізілуде, бірақ соңғы қорытындыны қара жәшіктерді талдағаннан кейін шығаруға болады. Дегенмен, ұшақтың Грозныйдан алыс емес жерде Ресей әуе кеңістігінде сыртқы зақым алғаны қазірдің өзінде белгілі болды. Біздің ұшағымыз электронды кедергіге ұшырады, бұл оны іс жүзінде бақылаудан шығарды. Жерден атқылау нәтижесінде артқы бөлігі мен фюзеляж айтарлықтай зақымдалғаны да белгілі», - деді Әзірбайжан президенті. 

Оның тапсырмасына сәйкес, Ресейдің жеті қаласына ұшу белгісіз мерзімге тоқтатылды, сондай-ақ Әзірбайжанның үш қаласына ресейлік әуе компаниялардың рейстері шектелді. Бұл шешім жолаушылардың қауіпсіздігін қамтамасыз ету мақсатында қабылданған.

27 желтоқсанда Федералдық әуе көлігі агенттігі ұшақ құлағанға дейін «Кілем» жоспарына сәйкес ұшқышсыз ұшу аппараттары шабуылдарына тойтарыс беру жұмысы болғанын мойындады.

28 желтоқсанда президент Путин Әзірбайжан президенті Ильхам Әлиевке телефон шалды. Қоңырау барысында Ақтаудағы ұшақ апатына қатысты мәселелер талқыланды. Путин Әзірбайжан президентінен кешірім сұрады.

Осыдан кейін ресейлік тараптың бастамасымен Президент Тоқаев пен Путин телефон арқылы сөйлесті.