Бишімбаевтың бұрынғы әйелі оның алименттен қалай жалтаруға тырысқанын айтты

Сотталған экс- министр Қуандық Бишімбаевтың бұрынғы әйелі алиментке қатысты сот дауы жайында баяндады, деп хабарлайды Orda.kz.

Назым Қаһарманның айтуынша, балаларының әкесі ата-ана ретіндегі міндетін орындаудан тағы да жалтаруға әрекет жасап отыр. Бұл жолы ол алимент мөлшерін азайтуды талап етіп, сотқа талап арыз берген. Бишімбаев тарапынан келтірілген уәж — ажырасу кезінде жасалған алименттік келісім бойынша төлеуге «мүмкіндігі жоқ» екені.

«Алименттік келісім — ең мықты заңдық құралдардың бірі. Оны жай ғана жоққа шығару немесе “орындаудан бас тарту” мүмкін емес. Ол тек балаларды ғана емес, анасы мен әкесін де қорғайды», — деді Назым.

Оның айтуынша, оның  адвокаттары  Салтанат Нүкенованы өлтіргені үшін сотталған Қуандық Бишімбаевтың қаржылық тұрғыда алимент төлеуге қауқарлы екенін дәлелдеген.

«Менің адвокаттарым Қуандықтың әлі кемінде 15 жыл бойы алимент төлей алатынын құжат жүзінде дәлелдеді. 15 жыл, елестетіп көріңізші?» — деді ол.

Назымның сөзінше, сотқа дейін Бишімбаев бірнеше жылжымайтын мүлік нысанын өзінің кәмелет жасына толған үлкен ұлына рәсімдеп берген. Оның жасы «жақында 26-ға толады». Мұндағы мақсат — кәмелетке толмаған балаларға алимент төлемеу.

Назым соттың алимент мөлшерін азайту туралы талапты қанағаттандырмағанын және Бишімбаевты алименттік келісім шарттарын орындауға міндеттегенін айтты.

«Егер Қуандық өз-өзін құрдымға кетіріп, сандырақ істермен айналыспағанда, қазір, бәлкім, әлдеқандай мультимиллионер болар еді. Тіпті миллиардер де болуы мүмкін еді. Ондай жағдайда бұл келісім оны қорғар еді — мен одан артық талап ете алмас едім», — деді ол.

Айта кетейік, Бишімбаев бұған дейін де алимент мөлшерін азайтуға тырысқан. Алайда ол кезде де мақсатына жете алмаған.