«Бас сүйегін тапқан»: Атырауда Яна Легкодимованың ісі бойынша сот өтіп жатыр

Атырауда Яна Легкодимованың өліміне қатысты іс бойынша сотталушылардан жауап алынды, деп хабарлайды Orda.kz.

Өткен сот отырысында Яна Легкодимова мен Ризуан Қайыржанов арасындағы хат-хабарлар зерттелген еді. Сондай-ақ, қыздың жеке күнделігі талқыланды. Бұл дәйектер іс бойынша маңызды дәлел болды. Кеше, 28 қазан күні сот сотталушылардан жауап алуға кірісті.

Екі сотталушы да куәлік беруден және сот сұрақтарына жауап беруден бас тартты.

Сотта сотталушылар алдын ала сөз байласу арқылы жасаған кісі өлтіру фактісін мойындады. Бірақ жәбірленушіні жалдап өлтіру және телефонды ұрлау деген айыптарды жоққа шығарды. 

Сот отырысы барысында Қайыржановтың көлігінен калий перманганаты (марганцовка) табылғаны айтылды. Судья сотталушыдан оның көлігінде неліктен тұрғанын сұрағанда, Қайыржанов «қажеттілік үшін» деп жауап берді. Олар қылмыс жасамас бұрын калий перманганатын уландыру үшін қолдануға болатынын талқылаған.

Сондай-ақ, сотта осы жылдың 20 маусымында өзен жағасында кездейсоқ  Яна Легкодимованың сүйегін тапқан ерлі-зайыптылардан жауап алынды. Олар қыздың тек бас сүйегін, омыртқасын және қабырғасының бір бөлігін тапқан.

Судья куәгерлерге дене қалдықтарын назардан тыс қалдырмай, полицияға хабарлағаны үшін рақмет айтты. Куәгерлер сүйек қаңқаларын тапқан кезді бейнежазбаға түсірген. Сот отырысында бейнажазба көрсетілетін кезде марқұмның анасы сот залынан уақытша шыға тұруды сұрады. Сот оның өтінішін қанағаттандырып, залдан уақытша шығуға рұқсат берді.

Бұдан басқа, прокурор бұған дейін сотталушы Алтынбек Катимовтың уақытша ұстау изоляторындағы аудиожазбасын ұсынды. Онда: 

«Біз оны суға батырдық. Ризуан екеуміз 2016 жылдан бері доспыз», — деп айтқан. 

Тергеушілер Алтынбек Катимов досының өтініші бойынша әрі 500 мың теңге көлемінде сыйақы алу үшін қылмыс жасады деп есептейді.

Жәбірленуші тарап айыпталушылардың іс - әрекеттерін ҚР ҚК-нің «ұйымдасқан қылмыстық топ», «қылмыс туралы хабарламау» баптары бойынша қайта саралауды сұрайды.

Айта кетейік, АҚШ-тан Алматыға есірткі тасыған ұлттық қауіпсіздік қызметкерлері анықталды.