Бас прокуратура «Қаржаубайды қамасын» дегендерге жауап берді

Сотталған азаматтардың туыстары марқұм Шерзат Полаттың әкесі Қаржаубай Нұрымовты қамауға алуды талап етіп, Қазақстан президенті мен Бас прокуратураға үндеу жолдаған еді. Осыған байланысты Бас прокурордың орынбасары Әсет Шындалиев журналистердің сұрағына жауап берді, деп хабарлайды Orda.kz.

Жолданған хатта олар президент Қасым-Жомарт Тоқаевтан, Бас прокуратура мен Ұлттық қауіпсіздік комитетінен трагедиядан кейінгі жағдайға құқықтық баға беруді сұраған.

Бүгін Бас прокурордың орынбасары Әсет Шындалиев бұл мәселеге қатысты ресми деректерсіз пікір білдіру мүмкін емес екенін айтты.

«Мен күдіктілердің немесе басқа адамдардың туыстары айтқан сөздерге сүйеніп, пікір айта алмаймын. Қылмыстық іс қозғау үшін жеткілікті негіз болуы керек. Істі қозғау туралы шешімді қылмыстық қудалау органы қабылдайды. Ол үшін тиісті арыз не өзге де материалдар келіп түсуі қажет. Олардың арыз берген-бермегенін мен білмеймін», — деді Шындалиев.

Сондай-ақ ол бұл іс бойынша сот үкімі әлі заңды күшіне енбегенін, тараптардың апелляциялық шағым түсіруге мүмкіндігі бар екенін еске салды. Шындалиевтің пікірінше, бұл іс бойынша тергеу және сот процесі объективті өткен.

«Процесс өте сапалы, ашық және әділ өтті. Үкім шығару кезінде барлық дәлелдер мен сот барысында берілген куәліктер ескерілді. Мұндай ашық сот отырыстарының мақсаты — істің әділ қаралғанын және ештеңе жасырын емес екенін қоғамға көрсету», — деді ол.

Сонымен қатар, Әсет Шындалиев Шерзат Полаттың отбасына тиесілі үйді өртеу ісі бойынша тергеу әлі жалғасып жатқанын мәлімдеді.

Айта кетейік, сотталғандардың туыстары Нұрымовтың әрекетін құқық қорғау органдары тексеруі тиіс деп есептейді. Олардың айтуынша, оның әрекеті қоғамда шиеленіс туғызып, әлеуметтік тұрақсыздыққа алып келген.

Еске салсақ, Orda.kz тілшісі жәбірленуші тараптың адвокаты Мейірман Шеккевтен сұхбат алды. Талдықорғандағы Шерзат Полат ісі бойынша ашық сот процесінің ерекшеліктері мен есте қалған тұстарына тоқталды. Адвокат үкім шықса да, қоғамда әлі де қойылып жатқан «қылмысқа итермелеген басқа біреулер болды ма?», «неге нақты айғақтар ескерілмеді?» деген сауалдарға өз жауабын берді.