Атышулы Хелиф Олимпиададағы даудан кейін кәсіпқой рингтегі алғашқы жекпе-жегін өткізеді

Алжирлік Олимпиада чемпионы, боксшы Иман Хелиф гендерлік тестке қатысты даудан кейін кәсіпқой рингтегі алғашқы жекпе-жегін өткізеді, деп хабарлайды Orda.kz.      

Алжирлік спортшы 23 сәуірде Парижде рингке шығады. Оның қарсыласы — Германияның тәжірибелі боксшысы Юлия Игель болады.

Иман Хелиф үшін бұл кәсіпқой аренадағы екінші жекпе-жек болмақ, алғашқысы Олимпиадаға дейін өтіп, қарсыласын үшінші раундта нокаутпен жеңген еді. Олимпиададағы жеңісінен кейін Хелиф ресми жекпе-жек өткізген жоқ.

Еске салсақ, Иман Хелифке қатысты дау 2024 жылы Парижде өткен Олимпиада ойындары кезінде басталған. Әйелдер боксы бойынша жарыстың 1/8 финалында италиялық Анджела Карини алжирлік боксшымен жекпе-жектен бас тартып, оның «ерекше күшін» себеп ретінде атаған.

Осыдан кейін әлеуметтік желілерде Хелифтің спорттық нәтижесін жақсарту үшін жынысын өзгерткен деген айыптаулар тарады. Көптеген танымал тұлғалар, соның ішінде Дональд Трамп, Джоан Роулинг және Илон Маск боксшыны жарыстардан шеттетуге шақырған болатын.

Олимпиада Хелифтің жеңісімен аяқталғаннан кейін ол өзіне тағылған айыптар бойынша сотқа жүгінетінін мәлімдеді.

Бұл оқиға 2025 жылы жалғасты. World Boxing ұйымы әлем чемпионатына қатысатын барлық спортшылар міндетті түрде генетикалық тест тапсыруы тиіс екенін хабарлады. Алжирлік боксшы бұл тесттен өтуден бас тартқандықтан, жарысқа жіберілмеді.

Кейін Спорттық арбитраждық соттың (CAS) баспасөз қызметі Хелифтің World Boxing шешіміне қарсы апелляция бергенін хабарлады, алайда ол турнирге қатыспады.

Бұған дейін Халықаралық олимпиада комитеті (ХОК) Олимпиада ойындарындағы әйелдер жарыстарына тек генетикалық тест арқылы жынысын растаған спортшылар ғана қатыса алатынын мәлімдеген еді.

Оқи отырыңыз:

• Алжирдің атышулы боксшысы Иман Хелиф Олимпиада чемпионы атанды
• «Кәсіби боксқа ауысады»: Жұрт трансгендер деп шулаған Иман Хелиф мәлімдеме жасады
• Трансгендерлердің Олимпиадаға қатысуына тыйым салынды