Атырауда жоғалған отбасы ісі: Ерлі-зайыптылардың мәйіті табылды

Атырау облысында 2025 жылдың қазан айынан бері іздеуде жүрген отбасы мүшелерінің — ерлі-зайыптылардың мәйіті табылды, деп хабарлады Orda.kz.

Қызылқоға ауданы Жангелдин ауылының тұрғындары — Мақсот Қарабалин, оның жұбайы Нәсіп Үтешқалиева және олардың балалары Мирагүл мен Наурыз бірнеше ай бұрын ұшты-күйлі жоғалып кеткен болатын. Бүгін осы іске қатысты қайғылы мәлімет белгілі болды. Дереккөздердің хабарлауынша, ерлі-зайыптылардың денесі табылды.

Қазіргі уақытта оқиға орнында құқық қорғау органдары мен жедел қызмет өкілдері тергеу амалдарын жүргізіп жатыр. Атырау облыстық полиция департаменті Orda.kz редакциясына бұл ақпаратты растады.

«Қызылқоға ауданында бұған дейін Атырау облысында хабар-ошарсыз кеткен деп есептелген ерлі-зайыптылардың мәйіттері табылды. Қалған екі адамды іздеу жұмыстары жалғасып жатыр. Аталған дерек бойынша кісі өлтіру белгілерімен қылмыстық іс қозғалды. Күдіктінің жеке басы анықталды, полиция оны іздестіріп жатыр»,  деп хабарлады полиция департаменті.