Атырауда егде жастағы үш адам газдан уланып көз жұмды

Атырауда үш адам газдан уланып мерт болды, деп хабарлайды Orda.kz. 

Қайғылы жағдай кеше, 28 желтоқсан күні түскі уақытта болған. Томарлы ауылдық округіндегі жеке тұрғын үйлердің бірінен 3 адамның мәйіті табылды.

Төтенше жағдайлар департаментінің мәліметінше, 1958 жылы туған ерлі-зайыпты мен 72 жастағы ер адамның көз жұмғаны белгілі болды. Үшеуі де жедел қызмет келгенге дейін қаза тапқан.

Алдын ала болжам бойынша, газбен жұмыс істейтін жылыту пешінен ақау шыққан. Қазір оқиғаның мән-жайы анықталып жатыр.

Айта кетейік, Ресей әскерлерінің Украина астанасына жасаған жаппай шабуылы салдарынан бір ер адам қаза тауып, 32 адам жарақат алды, олардың екеуі — балалар. Қаланың электр қосалқы станциялары зақымданып, Киев дерлік толықтай қараңғылық құшағына енді.