Атырауда алтыннан қымбат «Алтын белгіге» қатысты сот шешімі шықты

Атырауда арнайы ауданаралық әкімшілік сот білім басқармасының екі түлекке «Алтын белгі» беруден бас тартқанын заңсыз деп таныды, деп хабарлайды Orda.kz.

Ақ Жайық мәліметінше,  Екі оқушы мектепті үздік тәмамдап, сәйкес үлгідегі аттестат алды. Дегенмен, білім басқармасы «Алтын белгі» беруден бас тартты. Түлектердің заңды өкілдері шешімді сотқа берді.

Комиссия шешімінің негізі — педагогтар енгізген бағаларды түзету еді. Алайда сот оқушылардың мұғалімдердің қателері үшін жауапқа тартылмайтынын атап көрсетті.

Сот оқушылардың 5–11 сыныптардағы барлық тоқсандық, жылдық және қорытынды бағалары «үздік» болып, қорытынды аттестацияны сәтті тапсырғанын ескерді. Баға қою және түзету тек педагогтардың құзыретінде, сондықтан оқушылар мұғалімдердің әрекеті үшін жауап бермейді. 

Сот комиссия шешімін жойып, білім басқармасына «Алтын белгі» беруді қайта қарауды міндеттеді. Атырау облыстық соты бұл шешімді өзгеріссіз қалдырды. Түпкі нәтиже  бойынша оқушылар «Алтын белгі» алуға құқылы және білім басқармасы оны орындауға міндетті.

Оқи отырыңыз:

• «Рұқсатсыз дәретханаға кеткен»: Алматы облысында мұғалім оқушысын сотқа берді
• 1 қыркүйекке қарай Алматыда қанша мектеп ашылады