Астанадағы тұрғын үй кешенінде лифт кенеттен құлап, бір адам қаза тапты

Астанадағы «Арыстан» тұрғын үй кешенінің тұрғындары лифт апатына байланысты дабыл қақты. Олардың айтуынша, үш жұмысшыны көтеріп келе жатқан лифт кенеттен құлап, салдарынан бір адам көз жұмып, тағы екі адам түрлі жарақат алды, деп хабарлайды Orda.kz.

Тұрғындардың сөзінше, үй пайдалануға берілген күннен бастап лифт жиі істен шығып отырған. Кей кездері адамдар ішінде қалып қойған, тіпті бұрын да құлаған жағдайлар тіркелген. Бұл тұрғын үй кешенін «Елорда құрылыс компаниясы» әкімдікпен бірлесіп салған. Алайда лифттің жарамдылығын тексеру екі рет жүргізілгенімен, нәтижелері расталмаған. Тұрғындар бірнеше рет шағымданғанмен, мәселе шешілмей келген.

Бұған дейін, 15 тамызда, осы кешенде тағы бір төтенше оқиға болған: бойжеткен лифтпен көтерілген сәтте құрылғы тоғызыншы қабаттан төмен құлап кеткен. Абырой болғанда, ол тірі қалған.

Полиция департаменті бұл дерек бойынша қылмыстық іс қозғалғанын растады.

«Жұмысшылар лифтке жөндеу жұмыстарын жүргізіп жатқан. Апат салдарынан бір адам қаза тауып, екеуі жарақат алды. Қазір оқиғаның мән-жайы анықталып жатыр», деп мәлімдеді полиция.

Ал Астана қалалық қоғамдық денсаулық сақтау басқармасының дерегінше, зардап шеккендердің бірі ауыр халде, екіншісінің жағдайы орташа.

«Екі жұмысшы көпбейінді қалалық №1 ауруханаға жеткізілді. Біреуі жансақтау бөлімінде, екіншісі жарақат алғандар бөлімінде ем алуда. Барлық қажетті медициналық көмек көрсетіліп жатыр»,  деп мәлімдеді басқарма.

Еске сала кетейік, Ақмола облысының әкімі Марат Ахметжанов «Хабар» тілшісінің реновация бағдарламасы бойынша сатып алынған жаңа үйлердің кейбірі апаттық жағдайда тұр деген сұрағына қатысты пікір білдірді.