Астанада аяғынан айырылған қыз қашан мектепке оралады?

Оқу-ағарту министрі Ғани Бейсембаев Астанадағы автобус апатынан кейін екі аяғынан айырылған қыздың мектепке қайта оралуы ұзақ уақыт алатынын және оның кезең-кезеңімен жүретін процесс екенін айтты, деп хабарлайды Orda.kz.

Министрдің айтуынша, қазіргі заңнамаға сәйкес, мұндай жағдайда бала алдымен үйде білім алады. Реабилитациялық кезең аяқталған соң ғана мектепке оралу мүмкіндігі қарастырылады.

«Бұл – ұзақ процесс. Қайғылы оқиға жуырда ғана болды. Алдымен баланың психикалық және физикалық жағдайына назар аударуымыз қажет. Тек содан кейін ғана оның оқу үлгеріміне көңіл бөлінеді», – деді Бейсембаев.

Еске сала кетейік, 2 маусым күні кешкісін Астанада жолаушылар автобусы «Самал» ықшамауданы маңында бағанға соғылды. Апат салдарынан 15 адам жарақат алып, бір қыз бала екі аяғынан айырылды.