«Астана Банкі» АҚ-ның бұрынғы иесіне үкім шықты

22 сәуір күні Астананың қылмыстық істер жөніндегі ауданаралық соты «Астана Банкі» директорлар кеңесінің бұрынғы төрағасы және негізгі акционері Олжас Тоқтаровқа қатысты айыптау үкімін шығарды, деп хабарлайды Orda.kz.

Бұл туралы бүгін, 30 сәуірде Астанада өткен брифингте Сыбайлас жемқорлыққа қарсы іс-қимыл агенттігінің ресми өкілі Данияр Биғайдаров мәлімдеді.

Ол сырттай 10 жылға бас бостандығынан айырылды. Сонымен қатар, 14 миллиард теңгеден асатын  мүлкі тәркіленеді. Тұрғын үй, әкімшілік және өндірістік нысандар, жер телімдері, бағалы қағаздар мен криптовалюталар т.б. мемлекет қарамағына өтті.

Сондай-ақ банктің бірнеше қызметкері де кінәлі деп танылды. Алайда олар тергеу және сотпен ынтымақтастық жасағандықтан, оларға бас бостандығынан айыру емес, басқа жазалар тағайындалды.