«Алтын Емел» ұлттық паркінде Қызыл кітапқа енген сирек кездесетін дала қырандары балапан шығарды

Адам көзінен таса өмір сүретін қырандардың ұясы Басшы орманшылығы аумағында табылды. Дала қыраны Қазақстанның Қызыл кітабына енгізілген және сирек кездесетін әрі қорғалатын құс түріне жатады, деп хабарлайды Orda.kz.

Ұлттық парк өкілдері айтып өткендей, дала қыраны әдетте далада, жартылай шөлде немесе жазықта ұя салады. Бұл құстар өз ұяларын кейде жерге, кейде биік бұталарға немесе тастарға салады, бұтақпен, шөппен немесе жануарлардың жүнімен тоқиды.

«Аналығы әдетте бір немесе үшке дейін жұмыртқа салады. Оны 43-45 күнде басып шығарады. Аналық құс балапанын басып отырғанда жұмыртқадан балапан шыққанға дейін аталығы оған қорек тасиды. Балапандар бір мезгілде емес, бірінен соң бірі шығады. Бірінші шыққан балапан әдетте күштірек болады, ал кейін шыққан әлсіз балапан кейде аман қалмауы мүмкін», - деп түсіндірді «Алтын Емел» ұлттық паркінің мамандары. 

Балапандар қауырсындары жетіліп, қанаты қатайып 45-55 күннен кейін ұядан ұшуға дайын болады. Осы уақыт ішінде ата-аналар оларға қорегі тасып, асырайды (ұсақ сүтқоректілер, құстар). Балапандар ұядан ұшқаннан кейін де бірнеше апта бойы ата-аналарына тәуелді болады.

Еске салсақ, былтыр Түркістан тұрғыны  арыстан мен жыртқыш құстарды асырап,  істі болған еді.