Алматы қаласы әкімінің орынбасары Серік Құсайынов троллейбус паркін жаңғырту және 2022 жылы мегаполистен Талғарға дейін жеңіл рельсті көлік салу жобасының іске қосылуы туралы брифингте айтты

Құсайынов атап өткендей, троллейбустар алматылықтар арасында үлкен сұранысқа ие және бүгінгі таңда көліктің бұл түрін жаңарту қажет. Әкім орынбасарының айтуынша, троллейбустар соңғы рет 2012 жылы сатып алынған. Қазір қала бойынша 215 бірлік жұмыс істейді, оның ішінде 34 троллейбусты есептен шығару жоспарлануда.

– Бүгінгі таңда троллейбус паркі жалпы шығарылымы 165 көлікті құрайтын тоғыз бағытқа қызмет көрсетеді. Ай сайынғы жолаушылар ағыны шамамен 2,5 миллион адамды құрайды, – деді Алматы қаласы әкімінің орынбасары Серік Құсайынов

Сондай-ақ ол әкімдікте банк несиесі есебінен 190 жаңа троллейбус алу мүмкіндігі қарастырылып жатқанын, оны «Алматыэлектротранс» өтейтінін айтты.

Қалада троллейбустардың жүру жолындағы 41 шақырымнан астам қолданыстағы кабельдер ауыстырылды, сондай-ақ 600-ден астам жаңа тіректер орнатылды, 172 шақырым байланыс желісі қайта жаңартылды. Бұл жұмыстар троллейбустардың қалыпты жұмыс істеуі үшін жүргізілді.

Сондай-ақ Серік Құсайынов 2022 жылы Талғардың тас жолының бойында LRT салу жоспары туралы айтты. Ол қазірдің өзінде әлеуетті инвестор бар екенін, онымен тиісті келіссөздер жүргізіліп жатқанын мәлімдеді.

Бөлісіңіз: