«Алматыда әріптесін өлтіріп, мәйітін көмген фотограф»: Қылмыс 3 жылдаң соң әшкереленді

2022 жылдың жазында жұмбақ жағдайда жоғалған алматылық фотограф Захар Свириденконың мәйіті табылды. Оны әріптесі пышақтап өлтіріп, денесін көміп кеткен, деп хабарлайды Orda.kz.

Kozachkov offside Telegram-арнасынындағы мәліметке сүйенсек, Захар Свириденко көптеген жылдар бойы түрлі қазақстандық басылымдарда жұмыс істеген. Ол 2022 жылдың жазында жұмбақ жағдайда жоғалған. Фотограф жоғалған күні көршілері оның үйінде жиын болғанын, кейін айқай-шу естілгенін айтқан. 

Қылмыс араға 3 жыл салып әшкере болды. 2025 жылдың көктемінде полиция жасырынып жүрген фотограф Ержан Сейітқожаны ұстады. Оған Свириденконың үйінде өткен кешкі жиынға қатысты бірнеше сұрақтар қойылды.

Фотограф Захарды өлтіргенін мойындады. Оның айтуынша, дастархан басында екеуінің арасында жанжал туындап, Ержан Сейітқожа Свириденконы бірнеше рет пышақтап тастаған. Содан кейін ер адам досының денесін көліктің жүксалғышына салып, қылмыс орнынан қашып кетеді. Фотограф полицейлерге марқұмның денесін көмген жерді де көрсетті. Жүргізілген ДНҚ талдауы адам сүйегінің Захар Свириденкоға тиесілі екенін анықтады. 

Ержан Сейітқожа сотта өз кінәсін толық мойындап, 10 жылға бас бостандығынан айырылды. Ол сондай-ақ жәбірленушінің туыстарына 10 миллион теңге көлемінде моральдық залалды өтеуі тиіс. 

Айта кетейік, 3 қазанда атыраулық қыздар жергілікті блогер қызды зиратқа апарып соққыға жықты.