Алматы облысындағы күре жолдағы жол апатынан әйел адам қаза тапты

Алматы облысында қарсы бағытқа шығып кетіп соқтығысқан жол апатынан әйел адам қаза тапты. Бұл туралы Orda.kz Алматы облысының полиция департаментіне сілтеме жасап хабарлайды.

Жол-көлік оқиғасы Алматы – Көкпек – Көктал автожолының 38-шақырымында болған. Апат салдарынан жеңіл көліктің жолаушысы көз жұмды. 

Полицияның алдын ала мәліметінше, 32 жастағы Mercedes-Benz автокөлігінің жүргізушісі рөлге ие бола алмай, қарсы қозғалыс жолағына шығып кеткен. Сол жерде ол Hyundai маркалы көлікпен соқтығысқан.

Hyundai көлігінің жолаушысы алған жарақаттарынан оқиға орнында көз жұмды. Екі көліктің де жүргізушілері және тағы үш жолаушы түрлі дене жарақаттарымен медициналық мекемеге жеткізілді. Жол апаты салдарынан бір адам қаза тауып, тағы бес адам зардап шекті.

Аталған дерек бойынша қылмыстық іс қозғалып, полиция сотқа дейінгі тергеп-тексеру жұмыстарын жүргізіп жатыр.

Жақында «Алматы – Бішкек» автожолында болған жол апатынан 3 адам тіл тартпай кетті.  Олардың екеуі — Үндістан азаматы еді.

Оқи отырыңыз:

• Алматыдағы атышулы жол апаты нәрестені тағдыр тауқыметіне ұшыратты
• Бір қызды аяғынан айырған жол апаты: Астанада жүргізушіге рақымшылық берілді
• Жыл басынан бері Қазақстанда 29 мыңнан астам көлік апаты болды