Алматы әуежайында қызметкерді кепілге алған ер адамға қатысты қосымша тергеу аяқталды

Биыл 7 наурыз күні әуежайда пышақ ұстап, қызметкер қызды кепілге алған адамның бейнежазбасы  жұрттың жағасын ұстатқан болатын. Осы Алматы халықаралық әуежайында болған іске қатысты жүргізілген қосымша тергеу жұмыстары аяқталды, деп хабарлайды Orda.kz.

Ішкі істер министрлігінің көліктегі полиция департаментінің мәліметінше, прокуратураға қайтарылғаннан кейін іс бойынша қосымша сотқа дейінгі тергеу жүргізіліп, нәтижесінде Машрабек Баратовқа тағылған айыптың құқықтық сараптамасы өзгеріссіз қалды.

Сонымен қатар, оқиға кезінде өз еркімен кепілге алынған әйелдің орнына ауысуды ұсынған Мұса Әбдірайымов жәбірленуші ретінде танылды.

Еске сала кетейік, Баратовқа үш бап бойынша айып тағылды:

• кепілге адам алу;
• қару қолдану арқылы бұзақылық жасау;
• терроризм актісі жайлы жалған ақпарат тарату.

Қылмыстық іс бойынша сот отырысы биыл сәуір айында басталды. Бірақ, құқықтық бұзушылықтарға байланысты іс прокурорға кері қайтарылған еді.

Айта кетейік, 7 наурыз Алматы әуежайында қарулы адам сонда істейтін қызметкерді кепілге алған еді. Артынша оқиға орнында болған Мұса Әбдірайымов қызметкер қыздың орнына өзін кепілге алуды сұрап, оның қаруын тартып алған болатын.