Al Jazeera мен Президенттік ТРК тағы бір бірлескен жобаны жүзеге асыруда

Al Jazeera мен Президенттік теле-радио кешені тағы бір бірлескен жобаны жүзеге асырып жатыр, - деп хабарлайды Orda.kz.       

Еске салайық, 2024 жылдың ақпан айында Қасым-Жомарт Тоқаевтың Катарға мемлекеттік сапары аясында Президенттік теле-радио кешені мен AlJazeera Media Network арасында ынтымақтастық туралы келісім жасалған болатын.

Екі медиа-компанияның алғашқы бірлескен «Әл-Жазирамен апталық» жобасы болды. 2024 жылдың сәуір айында Мақсұт Нәрікбаев атындағы университеттің халықаралық журналистика мектебінің 100-ден астам студенті әлемдік деңгейдегі оқытушылар мен журналистердің қатысуымен бір апталық тренингті аяқтады. 

Жоба аясында Al Jazeera кәсіпқойлары, соның ішінде Al Jazeera Media Network бас директоры Мостефа Суаг қазақстандық журналистер мен БАҚ мамандары үшін бірқатар ашық дәрістер өткізді.

Ынтымақтастық туралы келісімді жүзеге асырудың келесі практикалық қадамы – «Әл-Жазира» медиа институтында Президенттік теле-радио кешені журналистерін оқыту. Жақын арада олар үшін Дохадағы Al Jazeera Media Network кеңселерінде жеке, бетпе-бет оқыту бағдарламасы ұйымдастырылады.

Қазақ журналистикасының кәсіби құзыреттілігін дамытуға бағытталған бірлескен жобалар тізбегі 2025 жылы жалғасады.

Осылайша, тараптар келесі жылдың сәуір айында Астанада екінші Әл-Жазира апталығын өткізуге келісті. Катар медиа корпорациясының мамандары МҰУ халықаралық журналистика мектебінің студенттері мен Қазақстандағы қазіргі журналистер үшін бірқатар шеберлік сабақтары мен семинарлар өткізеді.