Ақтөбеде құдыққа түсіп кеткен оқушы мен оны құтқармақ болған ер адам қайтыс болды

Ақтөбеде құдыққа түсіп кеткен оқушы мен оны құтқармақ болған ер адам қайтыс болды, деп хабарлайды Orda.kz.

Ақтөбе облысының Жарлы ауылында 9 жастағы қыз қоқыс қалдығы бар құдыққа түсіп кетті. Қыз баланы құтқару үшін түскен жаттықтырушы жігіт те құдықтан шыға алмады. 

Қайғылы оқиға кеше 17 маусым күні Ақтөбе облысының Байғанин ауданында кешке болды. Ауыл тұрғындары 2-сынып оқушысын құтқармақ болған күрес жаттықтырушысының құдық ішінде уланып, қайтыс болғанын хабарлады.

«Орны толмас қаза болды. Нұрбол 200 баланы тәрбиелеп, Жарлы ауылының балаларын Азия чемпионатына дейін жеткізген еді. Қыз баланы құтқарамын деп, өзі де уланып, қайтыс болды», — деді бір ауыл тұрғыны.  

Облыстық ТЖД бұл оқиғаны растады.

«17 маусым күні сағат 22:05 шамасында ішінде қоқыс қалдығы бар, тереңдігі 10 метрге жуық ескі құдыққа 9 жасар қыз бала түсіп кеткен. Оған көмектесуге ұмтылған 1987 жылғы азамат құдыққа түсіп, шыға алмағаны анықталды. Сағат 22:13-те екі адам құдықтан құтқарушылардың көмегімен шығарылды», — деп хабарлайды облыстық ТЖД-нің баспасөз қызметі.  

Құтқарушылардың көмегімен бала мен ересек адам ес-түссіз халде құдықтан шығарылды. Алғашқы медициналық көмек дер кезінде көрсетілді. Бірақ оларды аман алып қалу мүмкін болмады.

Еске сала кетсек, Ақтөбеде жарылыс болып, төбесі ортасына түскен көпқабатты үйге қатысты сараптама қорытындысы шыққаны жайлы жазған едік. Әкім мен әкімдіктің қызметкерлері тұрғындармен жолыққан болатын. Тұрғындар бір кіреберісті ғана жарамсыз деп танығанына наразы болды.