Ақтөбеде 8,9 млн шығын келтірген алаяқ әйел сот залынан босатылды

Ақтөбе соты Қылмыстық кодекстің 190-бабы 3-бөлігінің 3 және 4-тармақтары бойынша айыпталған Жұлдыз Мұстафинаны 2 жыл 8 ай мерзімге бас бостандығынан айырды. Алайда кәмелетке толмаған балалары бар болғандықтан, жаза өтеу мерзімі 5 жылға кейінге қалдырылды, деп хабарлайды Orda.kz.

30 жастағы сотталушыға 19 жәбірленуші шағым түсірген. Шығын көлемі — 8,9 миллион теңге. Қылмыстық іс 12 томнан тұрады. Сотталушының білімі жоғары, тұрмыста, бұрын да сотталған.

Сот мәліметінше, ол бұған дейін бірнеше рет алаяқтық үшін жауапқа тартылған. 2024 жылдың тамыз айында 3 жыл 2 ай мерзімге бас бостандығынан айырылып, сол жылдың 3 қазанында Қылмыстық кодекстің 190-бабы 3-бөлігінің 3-тармағы және 58-бабының 3, 6-бөліктері бойынша сотталған.

2025 жылдың 9 қыркүйегінде оған қатысты жаңа қылмыстық іс сотқа түскен. Бұл жолы ол 19 адамды алдап, ақша алған. Сотталушы өзіне тағылған айыпты толық мойындады.

«Жұлдыз Мұстафина Қылмыстық кодекстің 190-бабы 3-бөлігінің 3 және 4-тармақтарымен айыпты деп танылсын. Түпкілікті 4 жыл мерзімге бас бостандығынан айыру жазасы тағайындалсын. ҚР Конституциясының 30 жылдығына байланысты рақымшылық жасауға орай жаза мерзімінің үштен бір бөлігі қысқартылып, түпкілікті 2 жыл 8 ай мерзімге бас бостандығынан айыру жазасы белгіленсін», — деді судья Тұрсынхан Салықов. 

Сот үкіміне сай, жазаны өтеу орны — қылмыстық-атқару жүйесінің орташа қауіпсіздік мекемесі болып белгіленді. Алайда кәмелетке толмаған балалары болғандықтан, жаза өтеу 5 жылға кейінге қалдырылды. Сотталушы сот залынан босатылды.

Айта кетейік, бұған дейін Ақтөбеде 136 адамның мойнына 579 миллион теңге несие қарызын ілген емші де сот залынан босатылған болатын.