Ақтаудағы ұшақ апаты: Қазақстан тергеудің соңғы кезеңіне келді

AZAL әуе компаниясына тиесілі Embraer-190 ұшағының апатын тергеу әлі аяқталған жоқ. 25 желтоқсанда Ақтау маңында апатқа ұшыраған Azerbaijan Airlines (AZAL) әуе кемесіне қатысты тергеу есебі биыл жылдың соңына дейін немесе келер жылдың басында жариялануы мүмкін, деп хабарлайды Orda.kz.

Премьер-министрдің орынбасары Қанат Бозымбаев тергеудің екі бөлікке бөлінетінін еске салды. Қылмыстық құрамға қатысты бөлігін Бас прокуратура қарап жатыр, ал әуе апатының техникалық себептерін Көлік министрлігі зерттеп жатыр.

«Көлік министрлігі тергеудің соңғы кезеңіне келді. Қазір лицензия иелері мен технологияны әзірлеушілерден, аэронавигациялық құралдарға қатысты соңғы қорытындыларды күтіп отырмыз. Есеп биыл немесе келесі жылдың басында шығуы мүмкін. Ал Бас прокуратура жүргізіп жатқан бөлік бойынша да алға жылжу бар. Көрші елдердің басшыларының түрлі мәлімдемелерін де көрдіңіздер. Сол себепті бұл бағыттағы жұмыс та келесі жылы аяқталады деп үміттенеміз», – деді вице-премьер журналистерге. 

Еске салайық, Embraer-190 ұшағы 2024 жылдың 25 желтоқсанында Ақтау портының маңында құлаған. Бортта 67 адам болған, олардың 38-і көз жұмды. Қайтыс болғандардың арасында Қазақстанның алты азаматы бар. Бұл қайғылы оқиға Әзірбайжан мен Ресей арасындағы шиеленісті күшейтті, себебі әуе кемесінің Ресей әуе кеңістігінде зақым алғаны айтылған.