АҚШ-тағы су тасқыны: Тоқаев Трампқа көңіл айтты

Қазақстан президенті Қасым-Жомарт Тоқаев АҚШ президенті Дональд Трампқа Техас штатында болған жойқын су тасқынына байланысты көңіл айту жеделхатын жолдады, деп хабарлайды Orda.kz.

«Мемлекет басшысы табиғи апат салдарынан көптеген адамның, соның ішінде балалардың қаза тапқанына байланысты қайғыны терең күйзеліспен қабылдағанын жеткізіп, марқұмдардың отбасылары мен жақын туыстарына көңіл айтты», — делінген жариялаған Ақорда жеделхатта.

Сондай-ақ Қасым-Жомарт Тоқаев зардап шеккендердің тезірек сауығып кетуіне тілектестік білдірді.

Техастағы ахуал

Deutsche Welle мәліметінше, Керр округінде 43 адамның мәйіті табылды, олардың 15-і — балалар. Тағы жеті адамның денесі көршілес екі округтен табылған. Табиғи апат салдарынан қаза тапқандардың жалпы саны 50-ден асқан.

Округ шерифі Ларри Лейтаның айтуынша, Гуадалупе өзенінің маңында орналасқан жазғы лагерьде демалып жатқан 27 қыз бала әлі табылған жоқ. Сонымен қатар бірнеше баланың және ересек адамның жеке басы анықталмаған. Құтқарушылар лагерьдегі шамамен 750 қызды аман алып шыққан.

Апаттың негізгі себебі — өзен деңгейінің кенет көтерілуі. 4 шілдеге қараған түні су 45 минут ішінде сегіз метрге дейін жоғарылаған. Техастың бірнеше қаласында төтенше жағдай енгізілді.