АҚШ Газпромбанкке санкция салды

АҚШ Газпромбанкке санкция енгізу туралы шешім қабылдады, бұл банк бұған дейін санкциялардан босатылған еді, деп хабарлайды Orda.kz.

Bloomberg агенттігінің хабарлауынша, Байден әкімшілігі осы уақытқа дейін еуропалық елдерге ресейлік газ үшін төлем жасау мүмкіндігін беру үшін Газпромбанкке санкция салудан бас тартқан болатын. Алайда жағдай өзгерді. Еуропа Ресей энергия көздеріне деген тәуелділігін азайтып, санкцияларға жаңа қадам жасауға мүмкіндік алды.

Бұл күні тағы 50 ресейлік банкке санкция салынды. АҚШ қаржы министрлігі Украинадағы соғысқа байланысты ресейлік Газпромбанк пен оның Қазақстандағы филиалына санкция салды. Бұл туралы АҚШ-тың Шетелдік активтерді бақылау басқармасының (OFAC) жаңартылған тізімінде жазылған.

Газпромбанк — Ресейдің ең ірі банктерінің бірі. Оның филиалдары Қазақстан, Өзбекстан, Моңғолия, Үндістан және Қытайда орналасқан. Банкке қосымша, жаңадан енгізілген санкциялық тізімге Өзбекстандағы бөлімшеден басқа жоғарыда аталған барлық филиалдар енгізілді.

Газпромбанк сайтындағы мәліметтерге қарасақ, Қазақстан филиалын Асқар Аспандияров басқарады.

АҚШ-тың жаңа санкциялары 50-ден астам Ресей банктеріне қатысты, оның ішінде БКС-банк, «Центрокредит», «Кремлевский», «Синара» және «Итуруп» бар. Сондай-ақ, Ресей Орталық банкі басшыларының 11 өкілі, оның ішінде Орталық банк бірінші орынбасарлары Дмитрий Тулин мен Владимир Чистюхин, Орталық банк ұлттық төлем жүйесі департаментінің басшысы Алла Бакина, қаржы жүйесінің тұрақтылығы департаментінің жетекшісі Елизавета Данилова және басқалары санкцияға ілінді. Ал Орталық банк төрағасы Эльвира Набиуллина 2022 жылдан бастап америкалық санкциялар тізімінде.

2024 жылдың қаңтарында Газпромбанк теңгемен аударым жасауды тоқтатқанын хабарлады. Бір айдан кейін банк Қазақстан валютасында операцияларды қайта бастау туралы шешім қабылдағанымен, аударымдар үшін комиссия алуды жоспарлаған. Алайда қазір Газпромбанк сайтының мәліметіне сәйкес, теңгемен операциялар жүргізетін банк-корреспонденттер жоқ.