АҚШ билігі 43 мемлекеттің азаматтарына елге кіру ережелерін қатаңдатты

Трамп әкімшілігі басқа елден келгендердің, соның ішінде Ресей мен Беларусь азаматтарының кіруіне жаңа шектеулер енгізуді жоспарлап отыр, деп хабарлайды Orda.kz ақпарат агенттігі The New York Times басылымына сілтеме жасап.

Басылымның мәліметінше, АҚШ Мемлекеттік департаменті 43 ел үш санатқа – «қызыл», «қызғылт сары» және «сары» деп бөлінген ұсыным жобасын әзірледі.

«Қызыл» топқа азаматтарына елге кіруге толық тыйым салынған 11 мемлекет кіреді. Олардың қатарында  Ауғанстан, Бутан, Куба, Иран, Ливия, Солтүстік Корея, Сомали, Судан, Сирия, Венесуэла және Йемен бар.

«Қызғылт сары» топқа азаматтарына виза беру шектелетін он ел кіреді. Кіру тек «жоғары табысы бар іскер саяхатшыларға» қолжетімді болады, бірақ иммиграциялық немесе туристік визамен кіретіндерге жол жабық. Бұл тізімге Ресей, Беларусь, Эритрея, Гаити, Лаос, Мьянма, Пәкістан, Сьерра-Леоне, Оңтүстік Судан және Түркіменстан кіреді.

«Сары» топқа 22 ел кіреді, олардың азаматтары «АҚШ билігі көрсеткен» проблемаларды 60 күн ішінде жоюы керек. Әйтпесе, олар жоғарыда аталған топтардың біріне қосылуы мүмкін.

Бұл шаралар жақын арада ресми түрде жарияланады деп күтілуде. Жаңа шектеулерге қатысты бұрыннан визасы бар немесе АҚШ-та тұрақты тұруға рұқсат беретін жасыл карта иелеріне қатысты не болатыны әзірге белгісіз.

Айтпақшы, Қазақстан ұсынылған тізімде жоқ. Алайда басылым бұл тізімнің түпкілікті емес екенін және әлі де өзгеруі мүмкін екенін атап өтті.

Трамп 47-ші президент ретіндегі айтқан алғашқы сөзінде заңсыз иммигранттардың Америка жеріне кіруді дереу тоқтатып, миллиондаған мигранттарды экстрадициялау процесін бастауға уәде берген болатын.