Ақмола облысында ер адам түрмедегі тегін тамақ пен киім үшін қылмыс жасады

Ақмола облысында терроризм актісі туралы жалған хабар берген адам сотталды, деп хабарлайды Orda.kz. 

Аршалы аудандық сотында жалған ақпарат таратқан ер адамға қатысты қылмыстық іс қаралды.

Сот мәліметінше, күдікті 2019 және 2023 жылдары терроризм актісі туралы жалған хабар бергені үшін екі рет сотталған. 2025 жылғы тамызда ол осыған ұқсас қылмысты тағы да қайталаған.

Ол 112 нөміріне қоңырау шалып, Астана қаласындағы автовокзалда жарылғыш зат қойылғанын айтып, елді дүрліктірген. Оқиға орнына уәкілетті қызметкерлер жіберіліп, тексеріс барысында террористік акт туралы ақпарат расталмаған.

Сотта ер адам кінәсін мойындады.

Сот үкімімен ер адам 2 жылға бас бостандығынан айырылды. Ол қатаң режимдегі колонияда жазасын өтейді.

Айта кетейік, Атырауда әйелін 35 жыл бойы қызғанып, ақыры атып өлтірген ер адам сотталды.