Ақмарал Әлназарованың орнына Наурызбай Байқадамов сенат депутаты болып сайланды

2 мамырда палатаның жалпы отырысында Сенат депутаты болып сайланған Наурызбай Байқадамов Қазақстан халқына ант берді.

«Қазақстан халқына адал қызмет етуге, Қазақстан Республикасының тұтастығы мен тәуелсіздігін нығайтуға, оның Конституциясы мен заңдарын мүлтіксіз орындауға, маған жүктелген депутаттық жоғары міндеттерді адал атқаруға ант етемін»,- деді Байқадамов.

Естеріңізге сала кетейік, ол денсаулық сақтау министрі болып тағайындалған сенатор Ақмарал Әлназарованы ауыстырды. Байқадамов конституциялық заңнама, сот жүйесі және құқық қорғау органдары комитеті құрамына енді.

Наурызбай Байқадамов 1967 жылы туған, білімі жоғары (тарих және француз тілі). Ол «Аманат» партиясының мүшесі, Қызылорда облыстық мәслихатын басқарды.