73 жастағы зейнеткер түрмеде апелляциялық шағымның жауабын күтіп жатып көз жұмды

Тараз қаласындағы уақытша ұстау изоляторында 73 жастағы Талғат Телеуов қайтыс болды. Ол Жамбыл облысы бойынша мемлекеттік кірістер департаментінің қызметкеріне пара бергені үшін сотталған еді. Тергеу изоляторындағы өлімнің мән-жайын Orda.kz тілшісі анықтады.

Бұл ер адам жүрек-қан тамыр жүйесіне байланысты дертпен ауырған, ІІ топтағы мүгедек болған. Ұстау кезінде жедел жәрдемді 40 рет шақыртқан. Соған қарамастан, ол қамауда қалсын деген қаулы шыққан. Ол аяқ  асты қайтыс болған және бақылау камераларына тіркелген. Қайтыс болған сәтте оның жазған апелляциялық шағымы қаралып жатқан екен.

Не үшін сотталды?

2023 жылдың жазында Мерке кентінде екі миллион қорап контрабандалық темекі тиелген жүк ұсталды. Заңға сәйкес, бұл тауар жойылуы тиіс еді. Сондықтан ол Тараз қаласы әкімдігінің қаржы бөліміне уақытша сақтау үшін жіберілген.

Алайда 2024 жылдың басында Талғат Телеуов бұл туралы біліп, темекілерді заңсыз сатып, пайда табуды көздеген. Ол бұл іске күйеу баласы Элимхан Мұрадовты және мемлекеттік кірістер департаментінің қызметкері Сәкен Үкімбаевты тартқан. Сол арқылы тәркіленген темекіні алу мәселесін шешу үшін басқа қызметкер Жәнібек Қуанышевқа пара бермек болған. 

21 наурыз күні Телеуов Тараздағы «Қарахан Халал» дәмханасының жанында, көлік ішінде Қуанышевқа 200 мың долларды өзі қолма-қол тапсырған. Алайда сол кезде Қуанышев антикор қызметімен бірлесіп жұмыс істеп жүргендіктен сол түні «Газельге» тауарды тиеу кезінде барлық қатысушылар ұсталды.

Бірінші сатыдағы сот үкім шығарып, айыпталушыларға әртүрлі жаза тағайындады.

Телеуов 9 жылға бас бостандығынан айырылды. Алайда апелляциялық сот шешімін күтіп жатқанда уақытша ұстау изоляторында көз жұмды.