19 жастағы қыздың өлімі: жантүршігерлік мәліметтер анықталды

19 жастағы Аяжан Еділованың туыстары мен достары оның қайтыс болғаны туралы жаңалықтардан білді. Олар қылмыскер жауапкершіліктен құтылып кете ме деп қорқады.

Бұл туралы Orda.kz хабарлады.

Бүгін NeMolchiKZ зорлық-зомбылық құрбандарына көмек қоры өзінің Facebook парақшасында өлтірілген 19 жастағы Аяжан Еділованың туыстарының үндеуін жариялады.

Аяжан Еділова«Сымбат» дизайн және сән академиясында 4-курста оқитын. Ол интернет-дүкен ашып, өзінің авторлық жинақтарын сатумен айналысқан. Сонымен қатар, бойжеткен сұлулық салонында жұмыс істеген.

19 наурыз күні кешке бойжеткен жұмыстан 20:48-де шыққан, бірақ жатақханаға оралмаған.

Дабылды алғаш оның жігіті мен достары қақты. Кейінірек туыстары да қыздың жоғалып кеткенін білді. Олар 20 наурызда сағат 12:00-де полицияға хабарласқан.

– Алдымен олар арызды қабылдамады, өйткені барлығы митингте болды. Амалсыздан достары мен еріктілер қосылып, такси қызметіне сұраныс жасай бастады. Аяжанның ағасы сағат 15:00-де 102-ге қоңырау шалып, қыздың жоғалып кеткенін хабарлады, Жұмыста оны соңғы рет кешкі сағат 17:00 шамасында көрген. 21 наурызда еріктілер такси жүргізушісін тапқан, ол Аяжанды қайда алып барғанын айтты, - деп жазды қор өкілдері.

Мекен-жайы полицияға хабарланды, содан кейін олар оны абоненттік нөмірдің базалық станциясы арқылы іздеді.

– Біз мекен-жайға барған кезде түнгі сағат он бірлер шамасы болды. Оқиға орнында полиция жүрген. Олар қыздың жақындарын пәтерге кіргізбеді. Екі жедел жәрдем көлігі келді. Артынша ер адам шығарылды. Оның үсті қанға боялған. Күдіктіні жедел жәрдем көлігімен алып кетті. Содан кейін жедел уәкіл шығып, қыздың жоқ екенін хабарлады, - деп жазды қор.

22 наурызда шамамен сағат 12.00-де полиция туыстарына куәлік беруге шақырды, бірақ Аяжан қайтыс болды деп айтпады. Себебі олар оқиғаның қалай болғанын білмеді.

Аяжанның ағасы оның өлімін тек жаңалықтардан білді.

Жазадан жалтарып кете ме?

Марқұм Аяжанның туыстары қылмыскер психикалық ауру ретінде жауапкершіліктен жалтарып кете ме деп қорқады.

Жас қызды аяусыз өлтіргені үшін туыстары қылмыскерге өмір бойына бас бостандығынан айыру үшін өлім жазасын талап етіп отыр.

Аяжанның туыстарында оның неге белгісіз ер адаммен кездесуге барғаны туралы бірнеше нұсқалары бар. Оның бірі интернет-дүкенінің жұмысына байланысты. Жақындары «танысу үшін кездесуге барды» деген нұсқаны қабылдаудан бас тартып отыр, себебі қыздың жігіті болған.