12 жасар қызды зорлау және заңсыз түсік жасату: тәртіп сақшылары Жамбыл облысында алты айлық ұрықтың қалдықтарын іздеп жатыр

Жамбыл облысында 12 жасар қызды заңсыз түсік жасату фактісі бойынша полицейлер сотқа дейінгі тергеу амалдарын жүргізіп жатыр. Бұл туралы ақпаратты Orda.kz тілшісіне Талас аудандық прокуратурасы растады.

«Талас аудандық ішкі істер бөлімі Жаңатас қаласының 12 жастағы тұрғынына қатысты ҚР ҚК 319-бабының 3-бөлігі «Заңсыз түсік жасау» бойынша қылмыстық іс і тергеп жатыр» деп хабарлады ведомстводан.

Айта кетейік, бұл қазірдің өзінде тіркелген үшінші қылмыстық іс. Біріншісі – аудан депутатының күйеуі күдікке ілінген кәмелетке толмаған баланы зорлау ісі. Екіншісі, қылмыс фактісін жасырған мектеп қызметкерлеріне қатысты.

Естеріңізге сала кетейік, аудандық мәслихат депутаты Галина Мороздың 55 жастағы күйеуі  оқушы қызды зорлады деген күдікке ілінген. Алдын ала мәлімет бойынша, қылмыс 2022 жылдың жазында болған. Сол жылдың қараша айында қыздың анасы баласын Жаңатас қаласындағы мектеп-интернатқа ауыстырды, директор мен мұғалімдер оқушының жүктілігі туралы білді. Құқық қорғау органдарының хабарлауынша, болған жайды анасына ескертпестен, баланы жасанды түсік жасату үшін жеке емханаға жіберіп, ота шығынын өздері төлеген. Бұл фактіні оқиғаға қатысушылардың барлығы растады.

Қыздың анасы полицияға 2023 жылдың мамыр айында ғана арызданған. Оның айтуынша, күдікті қызына телефон алып беремін деп алдап, оның жүкті екенін білген соң қорқыта бастаған.