«1 қыркүйекте пышақ сұққан»: Таразда мектеп оқушысы төбелесте мерт болды

1 қыркүйекте Тараз қаласында мектеп оқушылары төбелесіп, бір жасөспірім пышақ жарақатынан қайтыс болды, деп хабарлайды Orda.kz. 

Оқиға мектептен тыс жерде болған. Алайда топтасып төбелескеннен болған жазатайым оқиға тіркелмеді. Қалалық білім бөлімі төбелеске екі мектептің балалары қатысты деген деректі жоққа шығарды. 

Қазіргі уақытта күдікті ұсталып, уақытша ұстау изоляторына қамалды. Тергеу амалдары жүргізіліп жатыр. Сонымен қатар, жергілікті билік жастар арасындағы құқықбұзушылықтың алдын алу шаралары күшейтілетінін жеткізді. 

«Қақтығыс тұрмыстық себептерге байланысты туындаған. Екі мектептің оқушылары арасындағы төбелес туралы ақпарат шындыққа сәйкес келмейді. Топтасып төбелесті деген деректер анықталған жоқ. Полицияның мәліметінше, күдікті ұсталып, уақытша ұстау изоляторына қамалды» деп жазылған ресми хабарламада.

Еске сала кетсек, дәл бір жыл бұрын Байзақ ауданының Құмжота ауылында жоғары сынып оқушылары төменгі сынып оқушыларын соққыға жығып, бір оқушы қаза тапқан еді. Полиция қылмыстық іс қозғап, бірінші сатыдағы сот шешімі шықты.