1 қалпақ үшін 9 қазақ сотталды: Қаржаубай өзін «қарақалпақ» дегендерге жауап берді

Шерзат Полат ісі бойынша сот үкімі шыққан соң Қаржаубай Нұрымов пен оның отбасына кейбіреулер «қалпақ» деп тіл тигізді. Дегенмен Шерзаттың әкесі мұндай сөздерді алғаш рет естіп отырған жоқ, деп хабарлайды Orda.kz.

Нұрымов бұл сұхбатты журналист Руслан Өтепбайдың YouTube арнасына берген. Ол онда өзін «арандатушы» деп айыптағандарға да жауап берді.

Қаржаубай  «қалпақ» деген сөздерді алғаш рет естіп отырған жоқ. Айтуынша, соңғы 35 жыл бойы «оралман», «қалпақ» секілді кемсіту сөздерден көз ашпаған.

«1986 жылы ата-анам Қарақалпақстаннан көшіп келген. Өзім Қазақстанда өстім, мектепке, балабақшаға бардым. Азаматтық алып, өмірімнің 35 жылын осы елде өткіздім. Бірақ бала күнімнен бастап мені «оралман» деп келемеждейтін. Бұл жағдайдан кейін тіпті күшейіп кетті. Сотта біреудің: «Тоғыз жергілікті қазақ бір қалпақ үшін сотталып жатыр» дегенін де естідім. Мүмкін, кейбіреулер осы сөзге сүйеніп, сотталушылардың жазасын жеңілдеткісі келген шығар. Бір адам тіпті бетіме қарап тұрып: «Әрине, Қаржаубай, сен қазақсың, бірақ тек биологиялық тұрғыда. Географиялық тұрғыда сен қазақ емессің», – деді. Айтарым – Алла бәрін көріп тұр, бағасын өзі береді», – деді Шерзаттың әкесі.

Қаржаубай Нұрымов Қонаевтағы уақытша ұстау изоляторында болғанда, ондағы басшылық өзіне блогерлермен және журналистермен сөйлеспеу туралы ескерту жасағанын айтты. Себебі бұл әрекет халықты митингіге немесе арандатуға итермелеуі мүмкін деген уәж келтірген. Ол тіпті елден кету туралы шешімді іштей қабылдағанын, бірақ кейін бұл ойынан бас тартқанын жеткізді.

«Мен ешқашан халықты митингіге де, арандатуға да шақырған емеспін. Тіпті іс жүріп жатқанда блогерлермен де байланысым болмады. Бар мақсатым — әділдікке қол жеткізу. Маған сондай ұсыныспен келгендердің өзіне бірден тойтарыс бердім. Халықтың зардап шеккенінен маған келер еш пайда жоқ. Қайғы менікі, өлген бала менікі, мәселе де менікі. Ал қазақ халқына тек алғысым шексіз. Егер халық бұл іске назар аудармағанда, бүгінгі күнге жетпес едік», – деді Нұрымов.

Айта кетейік, үкім оқылғаннан кейін сотталғандардың туыстары сот залында айғай-шу шығарып, Қаржаубай Нұрымовтың отбасына қарата «қалпақтар» деген сөзді бейәдеп сөздермен қосып айтқан болатын. Сонымен қатар, сотталған Равиль Сакиевтің анасы соттан кейінгі сөздері үшін айыпұл арқалады.