«1-ден 6 жасқа дейінгі балалар»: БҚО-да бес бала газдан уланып көз жұмды

Бүгін, 4 маусым күні Батыс Қазақстан облысы Сырым ауданы Жымпиты ауылында қайғылы жағдай болды. 5 бала көміртегі тотығына уланып қайтыс болды, деп хабарлайды Orda.kz Мой город басылымына сілтеме жасап. 

Сағат 15:00 шамасында Жымпиты ауылында тұрғын үй өртеніп жатқаны туралы ақпарат тарады. Үй ішінен бір жастан алты жасқа дейінгі ес-түссіз жатқан балалар шығарылып, ауруханаға жеткізілген. Барлық бала бір отбасыдан шыққан. Олар естерін жимаған күйі қайтыс болды. 

Өрт кезінде балалардың ата-анасы жұмыста болыпты. 

5 баланың өмірін жалмаған жеке тұрғын үйдегі өрт сөндірілді. Құтқарушылар 5 минут ішінде оқиға орнына жеткен. Оқиға орнында 30 шаршы метр аумақта жиһаз бен тұрмыстық заттар өртенген. Балалардың отбасымен психолог жұмыс жүргізеді. 5 баланың қазасына қатысты қылмыстық іс қозғалды. 

Еске салайық, сәуір айында Меркіде 3 қыз газдан уланып, мерт болды.