«Жүргізушінің эпилепсиясы бар»: Абай облысында көлік қаққан үш баланың жағдайы белгілі болды

19 тамыз күні сағат 16:00 шамасында Бестерек ауылында 55 жастағы Toyota автокөлігінің жүргізушісі рөлге ие бола алмай, үй қақпасының жанында, жолдан шамамен 10 метр қашықтықта тұрған балаларды қағып кеткен еді. Үш бала көз жұмып, үшеуі ауруханаға түсті. Балалардың біреуінің жағдайы өте ауыр, деп хабарлайды Orda.kz тілшісі.

Облыстық және республикалық деңгейдегі мамандардан құралған мультидисциплинарлы бригада толық диагностикалық тексерулер жүргізіп, науқастардың жағдайын бағалап, ота жасау жоспарын құрды.

Дәрігерлер балаларға ми-бас сүйек жарақаты, тірек-қимыл аппаратының және ішкі ағзалар жарақатын анықтады.

Балалардың жағдайы тұрақтандырылғаннан кейін оларды әуе борттарымен Астанаға жеткізу мәселесі шешілетін болады. Дәрігерлердің айтуынша, бір қыз баланың жағдайы өте ауыр болғандықтан, ол реанимацияда қалалы, себебі ұшақпен тасымалдауға жарамайды.

Қазіргі уақытта дәрігерлер бригадасы бір науқасқа миға күрделі нейрохирургиялық ота жасап жатыр, ал ішкі ағзаларында қан кету тоқтады.

Айта кетейік, мемлекет басшысының тапсырмасы бойынша Үржар ауданында жол апатынан зардап шеккен балаларға көмек көрсету үшін Қорғаныс министрлігінің С-295 әскери-транспорттық ұшағы құрамында нейрохирург, травматолог және реаниматолог бар медициналық бригада  ұшып келген болатын.

Ал редакцияның қолына түскен кадрлардан көліктің қоршауды қиратып, оның астында балалардың қалып қойғаны анық көрінеді.

Тағы үш бала — алты және тоғыз жаста — ауыр жарақатпен Үржар аудандық ауруханасына жеткізілді.

Полицияның мәліметінше, жүргізуші ұсталып, қазір уақытша ұстау изоляторында отыр. Сараптама оның апат кезінде мас болмағанын растады. 55 жастағы азаматтың тегі Аңсаев. Жүрек ауруы және эпилепсиясы бар. Оқиға болған күні ұстамасы ұстап қалып, рөлге ие бола алмаған көрінеді.

Абай облысының әкімі Берік Уәли қаза тапқан балалардың отбасыларына жерлеу рәсімін ұйымдастыруда барлық қажетті көмек көрсетуді, сондай-ақ материалдық және психологиялық қолдау жасауды тапсырды.

Денсаулық сақтау министрлігі балаларға медициналық қызмет көрсетуге үздік мамандар жіберілгенін мәлімдеді.

«Команда құрамында «Ұлттық нейрохирургия орталығы» АҚ нейрохирург дәрігері, травматолог дәрігер және реаниматолог Сейітбеков Сапарбек бар. Денсаулық сақтау министрлігі жағдайды ерекше бақылауда ұстауда. Балаларға медициналық көмек толық көлемде көрсетілуде, еліміздің үздік мамандары тартылған», деді Денсаулық сақтау министрлігі.