Журналистер мәдениет және ақпарат министрлігін сотқа берді

Бір топ журналист мәдениет және ақпарат министрлігін сотқа берді, деп хабарлайды Orda.kz.

«Әділ сөз» сөз бостандығын қорғау халықаралық қорының мәліметінше Астананың ауданаралық азаматтық сотына журналистер мәдениет және ақпарат министрлігінің үстінен шағым түсірді.

«7 қазанда Астана қаласының Азаматтық істер жөніндегі ауданаралық соты «Журналистерді аккредитациялаудың үлгілік ережесін» бекіту туралы жаңа бұйрық ережелеріне қарсылық білдіріп, тоғыз қазақстандық журналистің Мәдениет және ақпарат министрлігіне қарсы топтық талап арызын қабылдады. Талапкерлердің пікірінше, бұл нормативтік құқықтық акт  олардың сөз бостандығына және ақпарат таратуға заңды құқықтарын өрескел бұзады» делінген хабарламада.

Негізгі мәселе – аккредиттелген журналистердің мемлекеттік органдардан алынған ақпаратты журналисті аккредиттегеннен басқа кез келген басқа БАҚ арқылы таратуына тыйым салатын тармақ.

«Егер бұл шарт екі рет бұзылса, журналист алты айға дейін аккредиттеуден айырылуы мүмкін. Бұл талап, талапкердің пікірінше, Конституциясының 20, 39-баптарына және «БАҚ туралы» заңына қайшы келеді, олардың ақпаратты еркін алу мен таратуға конституциялық құқығын шектейді» делінген хабарламада.