Жоғалып кеткен ҚБТУ студенті 6 күннен бері табылмай жатыр

18 жастағы Қазақстан-Британ техникалық университетінің студенті із-түзсіз жоғалып кетті, деп хабарлайды Orda.kz. 

Orda.kz редакциясына хабар-ошарсыз кеткен Нұрислам Ақылбековтың туыстары көмек сұрап хабарласты. Олардың айтуынша, жігіт 2 шілде күні тауға шығып, сол күйі оралмаған. 

18 жастағы жігіт достарына жалғыз емес екенін, жанында тағы бір досы бар екенін ескерткен. Алайда Нұрислам досының аты-жөнін айтпаған. 

Студент жоғалғаннан кейін бірнеше күн өткен соң, оның туыстары полицияға жүгінді.

Таудағы іздеу шаралары жүріп жатыр. Жастарды Алматы ПД, ТЖМ Республикалық жедел-құтқару жасағының қызметкерлері, мемлекеттік ұлттық табиғи парктердің өкілдері мен еріктілер іздеп жатыр. Кеше, 7 шілде күні сағат 13:50-де Алматы қаласының санитарлық авиация қызметінің тікұшағы да іздеуге шықты. Экипаж құрамында төрт адам бары айтылды. 

Айта кетейік, қаңтарда ҚБТУ ғимараты өртке оранған еді.