Жетісуда есірткі зертханасы жойылып, 6,4 келі «синтетика» тәркіленді

Ескелді ауданында есірткі зертханасы жойылып, одан 6,4 келі синтетикалық «мефедрон» есірткісі тәркіленді, деп хабарлады ІІМ баспасөз қызметі.

Ішкі істер органдарының мәліметінше, Қазақстанға заңсыз есірткі өндіруді ұйымдастыру мақсатында екі шетелдік азамат келген. Олар өздерінің «кураторының» нұсқауы бойынша әрекет еткен. Операция барысында олардың сыбайласы делінген Астана қаласының тұрғыны да ұсталды.

Тінту кезінде тыйым салынған заттарды өндіруге арналған жабдықтар, 6,4 келі дайын мефедрон және прекурсор қалдықтары бар 200 литрлік реактор табылды.

Үш күдікті де қамауға алынды. Қылмыстық тізбектің ықтимал сыбайластары мен басқа да байланыстарын анықтау бойынша жедел-іздестіру шаралары жүргізілуде.