Жанармай бекетінде жарылыстан көз жұмған жұбайларды бүтін бір ауыл ақтық сапарға шығарып салды

Құлсарыға жақын орналасқан Тұрғызба ауылындағы жанармай бекетінде болған жарылыстан көз жұмған ерлі-зайыптыларды жақындары ақтық сапарға шығарып салды, деп хабарлайды Orda.kz.

Жылыой ауданын дүр сілкіндірген бұл қайғылы оқиға бір отбасының шаңырағын ортасына түсірді. Туыстарының айтуынша, қаза болған ер адамның денесінің бөліктерін жинауға тура келген, ал әйелінің денесі түгел жанып кеткен.

43 жастағы ер адам жарылыс сәтінде цистернаның ішінде болған, ал 40 жастағы жұбайы бекет ғимаратында жүрген. Екеуі де оқиға орнында қаза тапты.

Жерлеу рәсіміне бүтін ауыл жиналды. Жақындарының айтуынша, марқұмдарды тану мүмкін болмаған.

«Бұл өте ауыр... Алғаш естігенде, сенбедік. Жақында ғана көлік апатынан бір ерлі-зайыпты жақындарымыз қайтыс болды. Енді міне, осылар... Не айтарымызды да білмейміз», — деді туысы. 

Көршілерінің айтуынша, олар өте қарапайым, ешкімге жамандық ойламайтын адамдар болған. Артында үш бала қалды.

«Өте қарапайым, сабырлы адамдар еді. Үш баласы қалды. Енді олар өмірлерін қалай жалғастырады... Елестету қиын», — деді көршілері.

Атырау облыстық полиция департаменті қазір тергеу амалдары жүріп жатқанын мәлімдеді.

«Қылмыстық іс бойынша тергеу жүріп жатыр», — деп мәлімдеді полиция.

Еске сала кетейік, 30 мамыр күні Құлсарыда жанармай құю бекеті жарылып, 16 адам зардап шекті. Ерлі-зайыпты болған екі адам көз жұмды. Сол қаланың тұрғыны Ләйлә Сұлтанбаева тілшілерімізге оқиғаның қалай болғанын баяндап берген еді.