Жамбыл облысының әкімі жер сілкінісі болған аудандарды аралады

Жамбыл облысының әкімі Ербол Қарашөкеев жер сілкінісінен зардап шеккен Меркі және Т. Рысқұлов аудандарына барды, деп хабарлайды Orda.kz.

Меркі аудандық орталық ауруханасының, «Балдәурен» балабақшасының және Талдыбұлақ ауылындағы бір тұрғын үйдің қабырғаларында жарықтар пайда болған. Т.Рысқұлов ауданы Абай ауылындағы бір үй, Жаңатұрмыстағы 6 баспана, ауылдық мектеп пен Қарақыстақ округіндегі мәдениет үйі зақымданған.

Төтенше жағдайлар министрлігінің командалық орталығында сейсмикалық жағдайды бақылау бойынша жедел штаб құрылды. Құтқару жұмыстарына Меркі ауданында 55 адам мен 33 техника, Т.Рысқұлов ауданында 65 адам мен 40 техника жұмылдырылды.

Жер сілкінісінің күші Меркі ауылында 5 бал, Құланда 4 бал,  Тараз, Шу, Қордай және Мойынқұм аудандарында 2 бал болды.