Жамбыл облысындағы жер сілкінісінен 30-дан астам ғимарат зақымданды

28 наурыз күні таңғы 3:42-де Жамбыл облысында 5 балдық жер сілкінісі тіркелді. Меркі және Т. Рысқұлов ауылдарында ондаған ғимарат бүлінген, олардың қатарында әлеуметтік нысандар мен тұрғын үйлер бар, деп хабарлайды Orda.kz.

Меркі ауданында үш ауылдағы орталық аудандық аурухана мен медициналық пункттердің қабырғалары зақымданды. Дәрігерлік амбулаториялар мен фельдшерлік-акушерлік пункттерде жарықтарды анықталған. Сонымен қатар, Жаңатоған ауылындағы мүмкіндігі шектеулі балаларға арналған оңалту орталығы, балабақша, асхана және бір тұрғын үйге зақым келген.

Т. Рысқұлов ауданында 20-дан астам ғимарат бүлінген. Оның ішінде 4 мектеп, 3 балабақша, мәдениет үйі, медициналық пункт, спорт кешені және 11 тұрғын үй бар.

Зардап шеккендер туралы ақпарат түскен жоқ.

Аймақта ғимараттарды тексеруге 120 адам мен 73 техника жұмылдырылды. Оқиға орнында ҚР Төтенше жағдайлар министрлігі Сейсмологиялық мониторинг орталығының мамандары жұмыс істеуде.

Меркідегі «Мерке ірімшігі» зауытында сақталған 250 келі аммиакқа зақым келмеген. Биологиялық немесе радиациялық қауіпті нысандарда да ешқандай ақау анықталмады. Газ жүйесі, жолдар мен теміржолдар қалыпты жұмыс істеп тұр.

Жер сілкінісі ең соңғы рет Т.Рысқұлов ауданында 2003 жылы тіркелген. Ал Меркіде мұндай жағдай соңғы 160 жылда болмаған.