Жамбыл облысында 200-ден астам ауланы су басты

Жаңатаста кешегі жауған жаңбыр салдарынан 200-ден астам аула аумағын су басты. Зардап шеккендер видеоны әлеуметтік желіде бөлісті, деп хабарлайды Orda.kz тілшісі.

Облыстық ТЖД хабарлағандай, сағат 17:20-да Жаңатас қаласында жаңбыр салдарынан көлбеу ағын су пайда болып, Байсейітов, Аяпова, Есеева, Құрманғазы және Клочкова көшелерін басты.

«Сағат 19:00-дегі жағдай бойынша су деңгейі төмендеді, барлық көшелер тау етегінде орналасқан және жаңбыр суы арық желісі арқылы өтетін табиғи еңіске ағызылды. Ол жерен аққан су қаланың қақ ортасынан ағып жатқан Бүркітті өзеніне қосылады.  Азаматтық қорғау қызметтерінен құрылған жедел штаб жұмыс істеуде» делінген хабарламада.

Кейіннен су деңгейі төмендегені хабарланды. Тұрғындарға қажетті көмектер көрсетіліп, суды сору жұмыстары жүргізілуде. Жергілікті атқарушы органдардың, төтенше жағдайлар қызметінің 50-ден астам қызметкері, 17 бірлік техника, 11 мотопомпа және дрон жұмыс істеді.