«Жалған ДНҚ»: Қарағанды соты сәбилерді заңсыз асырап алу ісі бойынша үкім шығарды

Қарағанды облысында жаңа туған сәбилерді заңсыз асырап алу ісіне қатысты сот отырысы аяқталды, деп хабарлайды Orda.kz.

2022 жылы №2 перинаталдық орталықтың бір медбикесі баласы жоқ ата-ана мен жаңа босанған әйелге ұсыныс айтып, заңсыз бала асырап алуға мұрындық болған.

Жаңа босанған Ж. есімді әйел материалдық жағдайына байланысты нәрестесін перзентханада қалдырмақ болған.

Осылайша перзентханадан шыққаннан кейін К. мен Б. (асырап алушы ата-аналар) биологиялық анасын сәбиімен бірге ертіп үйлеріне барған. Жағдайды заңды етіп көрсету үшін ерлі-зайыптылар баланың анасымен К.-ның әкелік құқықтарын рәсімдеуге келіседі. Кейін олар сотқа жалған ДНҚ сараптамасының нәтижесін ұсынған және сәбиді ресми түрде асырап алған.

Алайда бұл бір ғана іс емес еді. 2023 жылы да дәл осы медбике басқа бір О. және И. есімді ерлі-зайыптыларға осындай «келісімді» жасауға көмектескен. Олар да Ж. есімді әйелдің жаңа туған нәрестесін алған және арнайы органдар арқылы жалған құжаттар рәсімдеген. 

Осы іске қатысты адамдардың бәрі сот алдында жауап берді.

• Асырап алушы ата-аналар ҚР ҚК 135-бабы («Кәмелетке толмағандар саудасы») бойынша кінәлі деп танылып, сегіз жылға шартты түрде бас бостандығынан айыру және пробациялық бақылау жазасына кесілді.
• Биологиялық ана Ж. орташа қауіпсіздік колониясында жазасын өтеуге міндеттеліп, бес жылға бас бостандығынан айырылды.
• Медбике орташа қауіпсіздік колониясында жазасын өтеуге міндеттеліп, сегіз жылға сотталды.