Заң бойынша тоқал алуға рұқсат беру керек — Абзал Құспан

Мәжіліс депутаты Абзал Құспан журналист Ербол Сейілханға берген сұхбатында елде екі әйел алуға тыйым салынғанын, бірақ заң жүзінде тоқал алуға рұқсат беру қажет екенін айтты, деп хабарлайды Orda.kz.

Оның айтуынша, өзі көп әйел алуға қарсы болғанымен, елде жағдайы жақсы азаматтардың көбі екінші әйелмен бірге тұрып жатқанын жасырмайды. Сондықтан бұл мәселені заңмен реттеу қажет деп санайды.

«Заңдық, құқықтық тұрғыдан келер болсақ, де-юре, де-факто деген ұғым бар. Оны заңгерлердің бәрі біледі. Де-юре – бізде екі әйел алуға тыйым салынған, оны білеміз. Заңсыз деп саналады, жауапкершілік жоқ, бірақ тыйым бар. Де-факто – шенеунік емес, тіпті кез келген жағдайы бар азаматтың екінші, үшінші, тіпті төртінші әйелдері барын білеміз. Дін жолындағы азаматтардың басым бөлігі осыны қолдайтынын білеміз. Қазір көбінің ісі құтырғандықтың белгісі. Тоқалдыққа кілең жас қыздарды алады», – деді депутат.

Ол бұл мәселенің өзінде шикілік барын айтты. Яғни, ешкімнің әмеңгерлік жолмен үйленуге ниеті жоқ. Сонымен қатар, депутат тоқалдыққа жесір әйел емес, жас қыз алатындар көп екенін атап өтті.

«Құбылыс ретінде бұған қарсымын. Бірақ мен немесе сіз қарсы екенбіз деп тоқтап жатқан адам жоқ. Сондықтан тоқалдықты заңдастырып, заңмен реттеу қажет деп есептеймін. Заң бойынша екінші әйел алуға рұқсат беру керек. Құқықтық нигилизм деген ұғым бар. Ол – заңның қолжаулыққа айналуы дегенді білдіреді. Қазір бұл тыйымды ешкім сақтап жатқан жоқ», – деп қосты Абзал Құспан.

Депутат қазіргі ахуалды «құқықтық нигилизмнің» көрінісі деп атады. Оның сөзінше, «қолданыстағы тыйым бар, бірақ оны ешкім сақтамайды, сондықтан заңның өзі қолжаулыққа айналған».

Айта кетейік, бұған дейін Ақмола облысында күйеуін өлтірген әйел сот үкімімен жазадан босатылды.