"Заң алдында бәрі бірдей" – Қошанов Қазақстандағы саяси тұтқындар туралы

Мәжіліс спикері Ерлан Қошанов Қазақстандағы саяси тұтқындардың, соның ішінде 7 жылға сотталған марафоншы Марат Жыланбаевтың ісіне қатысты пікір білдірді.

Мәжілістің жалпы отырысынан кейін журналистер Тоқаевтың "жаңа, әділетті Қазақстан" туралы сөздеріне назар аударып, жаңа билік тұсында саяси тұтқындардың саны артып келе жатқанын айтты.

Думан Мұхаметкәрім, Марат Жыланбаев және тағы басқалары – бәрі де билікті сынап, қазір темір тордың ар жағында отыр.

"Заң алдында барлығы бірдей деп есептеймін: оны бұзған адам жауапқа тартылуы керек. Процесс жүріп жатыр... Біз бұл процестердің бәрін білеміз. Бұл тергеу кезінде де, сот кезінде де ашық айтылды", - деді ол.

Қошанов Жыланбаевтың нақты не үшін түрмеге қамалғанына қатысты сұраққа жауап бере алмады, "заңды бұзғаны үшін" деп қысқа қайырды.