Венесуэланың Жоғарғы соты Мадуроның президенттік сайлаудағы жеңісін растады

Венесуэла Жоғарғы сотының төрағасы Карислия Беатрис Родригес 28 шілдеде Николас Мадуро жеңген президент сайлауының нәтижелерін растады.

Бұл туралы жергілікті Venezolana de Televisión хабарлады.

«Ұлттық сайлау кеңесі жариялаған 28 шілдедегі президент сайлауының нәтижелері расталды, онда азамат Николас Мадуро Морос Венесуэла Боливар Республикасының президенті болып қайта сайланды»,  деді елдің Жоғарғы сот төрағасы.

29 шілдеде Ұлттық сайлау комиссиясы Николас Мадуроның 51% дауыс жинағанын және оны 2025-2031 жылдар аралығындағы үшінші мерзімге президент деп жариялағанын хабарлады. Алайда Венесуэла оппозициясы президент сайлауының нәтижелері бұрмаланды деп мәлімдеді. Елде наразылықтар басталды.

Құқық қорғаушылардың мәліметінше, наразылық білдірушілер мен полиция мен әскерилер арасындағы қақтығыстан ондаған адам қаза тауып, жүздеген адам қамауға алынған.