Ұсталған LRT басшысы Тасмағанбетовке қарсы айғақ беруі мүмкін — БАҚ

LRT ісі бойынша Түркияда ұсталған Талғат Ардан жақын күндері Қазақстанға экстрадициялануы тиіс. DALA INSIDE дереккөзіне сенсек, Ардан тергеу барысында Иманғали Тасмағамбетовке қатысты айғақ беруі мүмкін. Егер бұлай болса, ол экс-шенеуніктің болашағы мен саяси жолына нүкте қоюы мүмкін, деп хабарлайды Orda.kz.

Иманғали Тасмағамбетовтің ҰҚШҰ басшысы ретіндегі өкілеттігі биыл аяқталады. Жаңа жылдан кейін ол бұл қызметпен қоштасуы керек. Алайда, Тасмағамбетов осы лауазымда жүрген кезінде Мәскеуге тиімді позицияны ұстанып, Кремльге жақын элитамен жақсы байланыс орнатқаны айтылып жүр. Сарапшылардың пайымынша, бұл болашақта, тіпті 2029 жылғы президент сайлауында да көмек болуы ықтимал.

«Талғат Арданның дәл қазір ұсталып, елге қайтарылуы жай ғана сәйкестік емес. Қажет жағдайда ол тергеуге Тасмағамбетовке қатысты айғақтар беруі ықтимал. Бұл билік тарапынан алдын ала жасалған тактикалық жүріс деуге болады» — дейді DALA INSIDE дереккөзі.

«Астана LRT» компаниясы 2011 жылы құрылып, оны басқаратын тұлға болып Талғат Ардан тағайындалған еді. Бұған дейін ол Астана әкімдігінің Көлік басқармасын басқарған. Компанияның мақсаты – астаналық көлік инфрақұрылымын жаңғыртып, жеңіл рельсті көлік желісін және интеллектуалды жүйелерді енгізу еді. Сол жылдары қала әкімі Иманғали Тасмағамбетов болғанын ескерсек, тергеу аясын кеңейтіп, LRT жобасындағы қаржылық былықтарды жоғары деңгейдегі саяси фигуралармен байланыстыруға болады.

«Тасмағамбетов Мәскеуге нақты қандай уәде берді? Мәселе – осында. Егер ол «Қазақстанды Ресей мен Беларусьтің одақтық құрылымына қосамын, тек маған билік қажет» деген мазмұндағы ұсыныс айтқан болса, Кремль оны соңына дейін қолдайтыны сөзсіз. Мұндай жағдайда Арданның айғақтарын пайдалану — ұлттық қауіпсіздік мүддесі тұрғысынан ақтауға болатын қадам. Бұл бағытта Астана да барын салуға тиіс»  — дейді дереккөз.

Еске сала кетейік, Астана LRT жобасындағы қаржы жымқыру дерегі бойынша іздеуде жүрген Талғат Ардан Түркия аумағында ұсталғаны туралы жазған едік.