Ұшақ апатын түсірген фотограф Азамат Сәрсенбаевты полиция ұстады

Фотограф Азамат Сәрсенбаев өзінің Facebook парақшасында полиция ұстағанын мәлімдеді. Оның айтуынша, ұсталуына Ақтау маңындағы ұшақ апаты орнын суретке түсіруі себеп болған болуы мүмкін, деп хабарлайды Orda.kz.

Оқиғаның толық мән-жайы әзірге белгісіз, бірақ бұл ақпарат әлеуметтік желілерде қызу талқыланып жатыр. Қолданушылар баспасөз еркіндігі мен оқиға туралы мәліметтерге қол жеткізу мәселесіне алаңдаушылық білдіруде.

«Ұшақ апатын түсіргенім үшін ұстаған болуы керек. Қазіргі кезде әлемдік БАҚ өкілдері: Reuters, Guardian, BBC, Lemondefr т.б. менің суреттерімді жариялап жатыр» деп жазды Сәрсенбаев.

Orda.kz тілшісіне полиция Сәрсенбаевтың «қоғамдық тәртіпті бұзғаны» үшін ұсталғанын мәлімдеді.

«Ол оқиға орнында дрон ұшырып, құтқарушылар мен тергеушілердің жұмысына кедергі келтірген және полиция қызметкерлерінің заңды талаптарына бағынбаған. Қазіргі уақытта құқық бұзушы полиция басқармасына жеткізілді, оған қатысты заңнамаға сәйкес шара қолданылатын болады», деп хабарлады Маңғыстау облысының полиция департаменті. 

Еске сала кетейік, 25 желтоқсан күні болған әуе апаты салдарынан 14 адам, соның ішінде екі бала жарақат алған болатын. Қазіргі уақытта апат орнында құтқару жұмыстары мен тергеу жүріп жатыр.

Orda.kz оқиғаның бақылап, жаңа мәліметтерді ұсынып отырады.